Lüdmila Pokrovskayanın hatırına

Mart ayın 18 gagauz gramatikanın temelini koyan anılmış bilimci, Lüdmila Aleksandrovna Pokrovskaya, tamannayaceydı 101 yaşını. Gagauziya M.V. Maruneviç adına Bilim-aaraştırma merkezinin zaametçileri andılar bu büük insanı, koyup çiçek Komrat muniţipiyindä bulunan onu anmak taftasına.

Lüdmila Aleksandrovnanın adı derin girdi türkologiyaya. O koydu çok zaamet hem vakıt, ki aaraştırmaa gagauz dialektlerini hem gagauz dilinin strukturasını. Lüdmila Pokrovskayanın işleri ilk akademika gramatikanın temeli oldular, ne verdi büük adım gagauz dilinin gelişmesinä. Bilimci topladı gagauz folklorunu, özelliklän dä çok çalıştı türkülärlän. Çok zaametleri için ona verildi ad Gagauziyanın saygılı vatandaşı.

Gagauziya BAM direktoru, İrina Konstantinova, nışannadı, ani Lüdmila Aleksandrovnanın işleri büün dä pek aktual aaraştırmacılar hem filologlar için. Onun katkısı gagauz dilinin ilerlemesinä pek büüktür.