Lüdmila Pokrovskaya tamannayaceydı 100 yıldönümünü

Mart ayın 18-ndä 2025 yılda anılmış bilimci, türkolog, profesor Lüdmila Aleksandrovna Pokrovskaya tamannayaceydı 100-ncü yıldönümünü. Bu gözäl dataya adalı Gagauziya M. V. Maruneviç adına Bilim-aaraştırma merkezi barabar Gagauziya Üüretim genel bakannıınnan, Gagauziya Kultura genel bakannıınnan hem Komrat Devlet Universitetinnän büün, mart ayın 21-ndä, geçirdi tombarlak masayı.

 

Kendi ömürünü Lüdmila Aleksandrovna koydu gagauz dilinin gelişmesinä, gagauz yazının, gramatikanın kurulmasına hem ilerlemesinä. Gelip Moldovanın üülen tarafına 1946-1947 aaçlık yıllarından hemen sora, o okadar beendi bizim tarafımızı, ki kaldı burada çok yıllara.

  

Bu vakıdın içindä bilimci hazırladı hem tiparladı çok kiyat, angıları baalıydılar gagauz dilinin gramatikasınnan; topladı gagauz halk türkülerini.

Çok zaamet Lüdmila Pokrovskaya barabar Gavril Gaydarcıylan koydu, ki Komrat Devlet Universitetindä açılsın gagauz filologiya kafedrası.

 

Tombarlak masaya katıldı bilimcilär, üüredicilär, studentlär hem üürenicilär, angıları andılar şannı profesoru hem onun katkısını gagauz dilinin gelişmesinä.