Büün duuma gününnän kutlȇȇrız saygılı vatandaşımızı- peetçiyi hem dil bilgisini LÜBOV ÇİMPOEŞİ. Dileriz çok saalık hem taa çok ii başarılar çalıştıı uurunda!

Duudu 1958-ci yılın avgust ayın 12-dä Gagauziyanın Çadır rayonunun Tomay küündä. 1975-ci yılda, ana küüyündä orta okulu başarıp, üürendi Kişinöv Devlet universitetindä biblioteka-bibliografiya fakultetindä (1975-1979). Başardı Moskvadakı M. Lomonosov adına devlet Universitetindä aspiranturayı. Korudu 1998-ci yılda “Gagauzların dastan êposu” konusunda bilim temasını. Artık irmi dört yıl Moldova Bilim Akademiyasının Gagauzologiya bölümündä çalışêr, bitki oniki yıl bölümün Başkanı olarak. Gagauz dastannarını aaraştırêr, folklorcu, literaturacı, türkolog. Dünnenin çok devletlerindä Canabisinin bilim aaraştırmaları tanınmış hem saygıda bulunêrlar. Gagauz dilindä peet yazêr. İki peet kiyadın avtoru – “Güz yolları ateş yanȇȇr” hem “Duygu başçesi”. Türk kulturasına büük izmetlerini tanıyarak, kendisinä 2003-cü yılda “Türk Dünnesinin yıl Folklorcusu’’ ödülü verildi. Gagauz dilinin hem kulturasının uurunda çalışmaları için, 2007-ci yılda Gagauziya Başkanı hem Halk Topluşun Metin Diplomunı kabletti.